Monday, December 6

उमेशको त्यो फोनले जब छाँगाबाट खसेजस्तै भएँ जितु

November 15, 2021 52

हास्य कलाकार जीतु नेपालले होस्ट गरिरहेको टेलिभिजन शो ‘मुन्द्रेको कमेडी क्लब’को प्रसारण सोमबारदेखि बन्द भएको छ । सोमबार अन्तिम शो प्रसारण भयो । अन्तिम शो प्रसारण हुनुभन्दा अगाडि मिडियासँग प्रस्तुत भएका जीतु केही भावुक देखिए । उनले यो शोमा सहभागी सम्पूर्ण टिम र अतिथिलाई धन्यवाद दिए ।

उसो त ‘मुन्द्रेको कमेडी क्लब’ बन्द गर्नुपर्छ भन्ने सोचमा जीतु थिए । तर, असारको अन्तिममा भव्य कार्यक्रमको आयोजना गर्दै शो बन्द गर्ने उनको सोच थियो । तर, उनको सोचभन्दा ८ महिना अगाडि नै शो बन्द हुन पुग्यो ।

पत्रकारको अगाडि उभिएका जीतुले यो शोका चर्चित कलाकार ‘फुलन्देकी आमा’ अर्थात् उमेश राईसँग चित्त दुखाए । उनले भने, ‘उमेशले अर्को एक रियालिटी शो होस्ट गर्दैछन् भन्ने सुनेपछि म अचम्ममा परें । उमेशलाई फोन गरेर सोध्दा उसले पनि हो भनेपछि म त छाँगाबाट खसेजस्तै भएँ । मलाई एक पटक सोधेको भए हुन्थ्यो भन्ने लाग्यो ।’

जीतुले कुनै पनि कलाकारसँग लिखित सम्झौता गरेका थिएनन् । यसैले पनि उनले उमेशसँग चित्त दुखाउनु बाहेक अरु कुनै उपाय थिएन । जीतुले भने, ‘मैले कोहीसँग पनि लिखित सम्झौता गरेको थिइनँ । कसैलाई पनि धेरै विश्वास गर्न नहुने रहेछ भन्ने पाठ सिकेको छु ।’

जीतु उमेशको कुरा गर्नका लागि यो शोको उत्पादन कम्पनी ‘कि एड्भरटाइजिङ’को ढोकासम्म पुगे । उनले त्यहाँबाट पनि सकारात्मक जवाफ पाएनन् । दुवैतिर गर्दा के फरक पर्छ र भन्ने जवाफ पाएपछि उनको चित्त दुख्यो । जीतुले भने, ‘आफ्नो अभिभावक संस्थाबाट नै सकारात्मक जवाफ पाएपछि चित्त नदुख्ने त कुरै भएन । उताबाट हौसला मिलेको भए शायद म असारसम्म शो सञ्चालन गर्ने मुडमा पुग्थें होला । तर, किबाट पनि हौसला दिने काम भएन । यसपछि शो बन्द गर्छु भनेर फर्किएँ ।’

प्रतिकृया दिनुहोस्